Komisioneri Shtetëror i Zgjedhjeve, Ilirjan Celibashi në një prononcim për mediat garantoi qytetarët në Elbasan, Kamëz dhe Vorë për fshehtësinë e votës, pasi në këto qytete, votimi më 14 Maj do të kryhet elektronikisht. Celibashi theksoi se kushdo që thotë të kundërtën është një spekulant politik.
“Kemi patur jo në mënyrë fare zyrtare, por kemi patur disa shqetësime të tilla që janë adresuar në KQZ në lidhje me sigurinë dhe garancinë e fshehtësisë së votës. Jam këtu për ta rikonfirmuar për të disatën herë si personi i duhur për ta bërë këtë, për të thënë që garancia është e plotë 100%. Kushdo që thotë të kundërtën është thjesht një spekulant politik dhe kërkon të përfitojë politikisht me këtë çështje”, u shpreh Celibashi.
Po ashtu sipas kryekomisionerit, disa qendra votimi në Elbasan mundet që të kenë vonesa në transmetimin e rezultatit si pasojë e mungesës së internetit. Celibashi njoftoi se në çdo qendër votimit do të ketë një operator teknik që të asistojë qytetarët nga pikëpamja teknike.