Kandidati i Partisë Demokratike zyrtare për Tiranën, Roland Bejko këtë të enjte u ndal në një takim me qytetarët në zonën e Kinostudios. Bejko dëgjoi shqetësimet e tyre, ku një prej tyre ishte prishja e banesave nga Erion Veliaj.
Ata shprehën shqetësim për prishjen e banesave të tyre nga ana e bashkisë me arsyetimin e prishjes pas tërmetit të 2019-ës. Bejko premtoi se nëse do të zgjidhet kryetar i Bashkisë, një gjë e tillë nuk do të ndodhë gjatë qeverisjes së tij, ndërsa shtoi se, prishja e banesave bëhet për interes të oligarkëve të qeverisë dhe Erion Veliajt.
“E kanë bërë sikur është prishur nga tërmeti, sikur ka çarje. Nëse s’ka çarje, bëhet enkas. Si duket i kanë vënë syrin të ndërtojnë ndonjë gjë të veten. Ne, nëse do të fitojmë s’do të lejojmë të bëhen gjëra të tilla. Këto janë në shërbim të klientëve të qeverisë, Ramës dhe Erion Velisë. Prandaj i bëjnë këto prishjet”, u shpreh Bejko.