Nga seanca e Kuvendit, kreu i Partisë Bashkimi për të Drejtat e Njeriut, Vangjel Dule tha se Fredi Beleri, është i burgosur politik dhe duhet të lirohet nga burgu. Kryetari i sapozgjedhur në Himarë ndodhet në burg i arrestuar në flagrancë mesnatën e 12 majit me akuzën për “korrupsion aktiv në zgjedhje kryer në bashkëpunim”.
“Kryetari i zgjedhur i bashkisë Himarë Fredi Beleri është i burgosur politik, i marrë peng nga Kryeministri Edi Rama. Fjalën e ka drejtësia por ka edhe një logjikë opinioni. Beleri është arrestuar në flagrancë për dyshime. Fredi Beleri duhet të lirohet dhe të shkojë në komunitetin e tij. Është marrë peng edhe Pandeli Kokaveshi, me të njëjtat akuza.
Është një i ri i cili ka bërë transplant zemre. Edhe pse i kam njoftuar të gjithë se atij i rrezikohet jeta ai vazhdon të mbahet peng. Në Himarë më të vjetrit më kujtonin 1945-ën, edhe atëherë votuan kundër regjimit. Edhe atëherë u syrgjynosën. Ku po e çoni vendin? Deri sa do ta mbështesni një autokritikat i cili po e zhyt në errësirën e Tiranës vendin”, tha Dule.