Italia po përjeton një situatë apokaliptike nga përmbytjet. 13 persona kanë humbur jetën deri më tani nga vërshimet në rajonin verior italian Emilia-Romagna, duke shkaktuar dëme në vlerë prej miliarda eurosh. Guvernatori rajonal tha se sektori i bujqësisë është goditur më së shumti.
Shirat e rrëmbyeshëm këtë javë kanë goditur pjesën lindore të këtij rajoni, duke shkaktuar mbi 300 rrëshqitje të dheut, duke nxjerrë nga shtrati 23 lumenj dhe duke shkatërruar 400 rrugë. Si pasojë e reshjeve, 23 komuna janë përmbytur.
Të paktën 10.000 persona janë detyruar të evakuohen nga shtëpitë e tyre, dhe banorët që janë ende në zonat e prekura nga vërshimet kanë mbetur pa energji elektrike. Edhe gara e Formulës 1 u anulua për shkak të vërshimeve.
Kjo është hera e dytë brenda këtij muaji që rajoni Emilia-Romagna përballet me mot të keq. Shirat e mëdha vijnë disa muaj pasi ky rajon u përballë me thatësira.