Ritmet e rritjes së turizmit këtë vit po shfaqen muaj pas muaji. Sipas të dhënave të stukturave akomoduese për muajin Mars, numri i turistëve është rritur me 29,8% krahasuar me Marsin e vitit të shkuar.
Numri i vizitorëve rezident është rritur me 15,9 %, ndërsa numri i turistëve jorezident është rritur me 46,6 %, pasi nga 27 mijë turistë të huaj në Marsin e vitit të shkuar këtë Mars janë regjistruar mbi 40 mijë.
Nëse u referohemi shtetësisë së tyre, veç shtetasve nga Kosova që përbëjnë përqindjen më të madhe në rritje të ndjeshme janë dhe turistët nga Italia të cilat përbëjnë rreth 8% të totalit si dhe ata nga Gjermania dhe Anglia.
Tregues tjetër pozitiv për turizmin e këtij vitit është edhe rritja e netë qëndrimeve në hotele. INSTAT raporton se gjatë muajit Mars, numri i netë qëndrimeve gjithsej është rritur me 36,1 %, në krahasim me Mars 2022.
Turistët vendas kanë një rritje me rreth 30%, ndërsa rritja më e ndjeshme është nga turistët e huaj, të cilët gjatë Marsit kanë shtuar me gati 45 % numrin e netëve të qëndrimit në hotelet e vendit.
Të huajt kanë preferuar qëndrimin në hotele por duket se rritjen më të madhe në raport me të njejtën periudhë të vitit parardhës e ka pjesa e kampingjeve, çadrave apo rulotëve, e cila ka pësuar një rritje me 2.2 herë më shumë në Mars të këtij viti.
Sipas të dhënave të INSTAT, jugu i vendit është preferuar më shumë nga turistët, pasi ka rritjen më të mdhe të vizitorëve me 77,8 %.