Një plumb në kokë i ka marrë jetën Arjan Gosës pasditen e sotme në Kavajë.
Mësohet se Gosa ishte duke pirë kafe me të atin në një lokal pranë shkollës “24 Maji”, kur një person i është afruar duke e qëlluar me armë zjarri.
Sipas informacioneve paraprake, autori, ende i paidentifikuar ka ikur në këmbë pasi ka qëlluar ndaj Gosës.
Policia thotë se po punon për identifikimin dhe kapjen e autorit. Shkak i vrasjes dyshohet se është hakmarrja, pasi në mars të këtij viti, Arjan Gosës iu vra i vëllai, për shkak të një konflikti banal. Dy persona mbetën të vrarë, mes tyre edhe Edmon Gosa.
Njoftimi i policisë:
“Më datë 21.05.2023, rreth orës 18.30, në lagjen Nr. 1, në Kavajë, në një lokal, një person ende i paidentifikuar ka vrarë me armë zjarri pistoletë shtetasin A. G.
Shërbimet e Policisë pas marrjes së njoftimit kanë shkuar menjëherë në vendngjarje, kanë rrethuar zonën, kanë ngritur pika kontrolli dhe vijon krehja e zonës për të bërë të mundur kapjen e autorit.
Grupi hetimor nën drejtimin e Prokurorisë ndodhet në vendngjarje dhe vijon veprimet hetimore për sekuestrimin e provave me qëllim identifikimin dhe kapjen e autorit.
Paraprakisht nga të dhënat e grumbulluara dyshohet se ngjarja ka ndodhur për motive hakmarrje”.