Rama takim në Peshkopi, falenderon edhe ata që nuk votuan në 14 maj: Nuk dhanë votën për një koalicion që ka ngrënë shuplakën më të rëndë
Në vijim të turit falënderues, kryeministri Edi Rama është ndalur sot në Peshkopi. Gjatë takimit me qytetarët, teksa shprehu mirënjohje për besimin që i dhanë më 14 maj, theksoi se këto zgjedhje ishin një shuplakë e rëndë për koalicionin “Bashkë Fitojmë”.
“Kanë votuar me mendje edhe pse me zemër të thyer, për të vetmen zgjidhje për të çuar përpara punët në Dibër. Dua të falënderoj edhe ata që nuk dolën të votojnë, ata që i thonë vetes të djathtë por në respekt të vetes, nuk e ndyen dorën për të vënë votën tek një koalicion i cili ka ngrënë shuplakën më të rëndë ndonjëherë nga shqiptarët që u bënë bashkë duke i votuar ose duke mos i votuar. Do bëj çdo përpjekje që është në dorën time, të gjithë ata që janë me mua, të bëjnë përpjekje që ajo harta elektorale që për herë të parë është harta e një Shqipërie që nuk është e ndarë, të mos jetë e tillë edhe për herë të fundit. Dua që ne ta shtyjmë përpara këtë vend dhe shoqëri që të votojë gjithmonë e më shumë me mend dhe jo me tifozllëk. Kjo disfatë skandaloze e atyre që e kanë marrë peng të djathtën shqiptare, nuk është disfata e njerëzve që besojnë në zgjedhje të tjera, por e një grushti njerëzish dhe një rrethi të verbërish rreth tyre”, tha Rama.