Policia Rrugore ka zhvilluar një aksion ditën e djeshme në Tiranë për gjobitjen e shoferëve me fëmijë të mitur në makinë, që nuk i kanë siguruar sipas rregullave të qarkullimit rrugor.
Policia thotë se gjoba për këtë shkelje varion nga 5 mijë deri në 15 mijë lekë të reja. Fëmija nën 12 vjeç që ndodhet në makinë duhet të sigurohet në ulësen e fiksuar me rrip sigurimi.
“Kushdo që nuk përdor rripat e sigurisë dhe sistemet e fiksimit, të parashikuara për pasagjerët deri në 12 vjeç, ndëshkohet me masë administrative, nga 5000 deri në 15 000 lekë. Kur shkelja i takon një fëmije në moshë jomadhore, përgjegjësia bie mbi drejtuesin e mjetit ose mbi atë që është ngarkuar me mbikëqyrjen e fëmijës, kur ai ndodhet aty në çastin e kryerjes së shkeljes.
Në rast se shkelësi është drejtuesi i mjetit, përveç masës së parë administrative, atij i vendoset edhe masa administrative plotësuese pezullim i lejes së drejtimit për një periudhë nga 6 deri në 12 muaj”, thuhet në njoftim.