Sali Berisha ka akuzuar sërish kundërshtarin e tij politik Edi Rama si një “anti-shqiptar që kujdeset për interesat e aleatit të tij Aleksandër Vuçiç”. Teksa komentonte tensionet në veri, Berisha në fjalën e tij në Kuvend, dënoi ato që i cilësoi si “sulme të turpshme” të kryeministrit Edi Rama ndaj homologut të tij të Kosovës, Albin Kurti.
“Edi Rama nuk kurseu për sulme, qoftë edhe për fatkeqësinë shtetërore të ish-kryetarit të LDK, Isa Mustafa, padinë në gjykatë ndaj ish-kryeministrit Ramush Haradinaj, vetëm pse ata nuk pranonin diktatin e padronit të tij, Vuçiç. Këto sulme të Edi Ramës ndaj Albin Kurtit dhe qeverisë së Kosovës, tregojnë se ky është një kryeministër fund e krye antishqiptar, skllav i padronit të tij në Beograd”,-deklaroi Berisha.
Sipas Berishës, qëndrimet e mbajtura nga Rama për situatën në Veri kanë si synim që ta shpëtojnë nga e ashtuquajtura “afera McGonigal”.