Kandidati i koalicionit “Bashkë Fitojmë” në Bashkinë e Kuçovës, Lefter Maliqi, ka reaguar pas vendimit të Kolegjit Zgjedhor i cili i kërkon Komisionit të Ankimeve dhe Sanksioneve që të marrë në shqyrtim ankimin e plotë dhe jo të pjesshëm të tij. Pas këtij vendimi ka reaguar edhe Lefter Maliqi, i cili tha se sot fitoi betejën e parë më drejtësinë.
“Drejtësia funksionoi! Sot fituam ‘Betejën e Parë’, në Kolegjin Zgjedhor, kundër KAS pranë KQZ me votë unanime! Mirënjohje Trupit Gjykues të Kolegjit Zgjedhor të përbërë nga 5 gjyqtarë profesionistë dhe të paanshëm! Mirënjohje dhe Avokatëve në këmbënguljen dhe mbrojtjen e tyre! Beteja ligjore vazhdon deri në kthimin e Bashkisë Kuçovë banorëve. Oligarku Pëllumb Hajdari nuk arriti dot të korruptonte Kolegjin siç ka korruptuar institucionet e tjera. E drejta do të fitojë! S’ka kthim pas! Kuçova patjetër “Kantier Ndërtimi” shumë shpejt!”, shkroi ai në rrjetet sociale pas vendimit.
Lefter Maliqi i ishte drejtuar KAS ku kërkonte hedhjen poshtë të vendimit të KZAZ së Kuçovës ku kishte shpallur fitues kandidatin socialist Kreshnik Hajdari në zgjedhjet e 14 majit, duke akuzuar kundërshtarin e tij se ka blerë votat.