682 vende të vakante ofrohen nga bizneset në të gjithë vendin për ata që janë në kërkim të një pune.
Shifra zyrtare e Shërbimit Kombëtar të Punësimit, i referohet vetëm vendeve të lira të publikuara on line në websiten puna.gov.al, ndërsa ka shumë biznese të tjera që operojnë në mënyra të ndryshme për gjetjen e forcës punëtore që u nevojitet. Por cilat janë profesionet më të kërkuara?
Nga një analizë e bërë vihet re se kërkesat variojnë nga zanatet që mund të arrihen nga individë me shkollim elementar deri tek profesione me nivel të lartë kualifikimi. Kështu, bizneset kërkojnë sanitarë, rrobaqepës, marangoz, shitës, punëtor krahu, ndihmës në kuzhinë, duke vijuar tek profesionet si ekonomist, polic, inxhinier, teknik prodhimi, jurist, etj.
Ajo që vihet re është se ka një fluks të lartë kërkesash për zantaçinj, si hekurkthyes, tornitor prerës i drurit, punues mermeri, sharrues druri, lulishtar, fadromist, etj. Secili nga bizneset përcakton kriteret që duhet të përmbushë i aplikanti dhe afatet e punësimit përmes një formulari specifik, ndërsa individët e interesuar mund të aplikojnë përmes dorëzimit të një CV-ja me të dhënat e tyre dhe eksperiencën e punës.