Hetuesit në Gjermani po shqyrtojnë provat për të vërtetuar se një ekip sabotazhi përdori Poloninë si bazë operacionale për të hedhur në erë tubacionet Nord Stream në Detin Baltik. Wall Street Journal raporton se një jaht 15 metra i gjatë i quajtur Andromeda dyshohet se është përdorur nga një grup sabotatorësh ukrainas dhe ka hyrë në ujërat territoriale polake.
Gazeta citon gjithashtu se ekuipazhi që ishte në këtë anije vendosi eksplozivë në Nord Stream 1 dhe më pas u drejtuan drejt Polonisë. Provat përfshijnë të dhëna nga radio dhe pajisjet e navigimit të Andromedës, si dhe telefonat satelitorë dhe llogaritë e Gmail që dyshohet se janë përdorur nga autorët.
“Të marra së bashku, detajet tregojnë se anija lundroi rreth secilit prej vendeve ku ndodhën më vonë shpërthimet, dëshmi që forcon besimin e hetuesve se Andromeda ishte instrumentale në shkatërrimin e tubacionit të vitit të kaluar,” raporton gazeta.
Në fillim të kësaj jave, Washington Post raportoi se qeveria amerikane mësoi nga një agjenci evropiane e inteligjencës për një plan sekret të ushtrisë së Ukrainës për të sulmuar tubacionet. Por një gjë e tillë u mohua kategorikisht nga Presidenti ukrainas Volodymyr Zelensky duke u shprehur se Ukraina kurrë nuk do të vepronte në këtë mënyrë.
Pushtimi rus i Ukrainës në Shkurt 2022 e vuri në qendër të vëmendjes politike mbështetjen e Evropës nga gazi natyror rus. Shkatërrimi i tubacioneve Nord Stream përshpejtoi kalimin tek furnizuesit e tjerë të energjisë.