Për herë të parë, presidentja e Kosovës Vjosa Osmani, do t’i adresohet Parlamentit Europian, me ftesë të presidentes së këtij parlamenti, Roberta Metsola. Adresimi i Osmanit është paraparë të mbahet në orën 11:30.
Kjo është hera e parë që një president i Republikës së Kosovës, si shtet i pavarur, do t’i drejtohet seancës plenare të Parlamentit Evropian. Osmani do t’i adresohet deputetëve të Parlamentit Europian lidhur me arritjet e Kosovës dhe rrugën e saj drejt anëtarësimit në Bashkimin Europian. Ajo do të shprehë mirënjohjen e qytetarëve të Kosovës për përkrahjen që Parlamenti Evropian ka ofruar për vendin që nga vitet e ’90-ta.
Dje në mbrëmje Osmani publikoi një flamur të BE-së nën sloganin ”Evropa, shtëpia jonë”! Publikimi vjen menjëherë pas konferencës së shtypit të Kryeministrit Edi Rama i cili njoftoi anulimin e mbledhjes formale mes dy qeverive, duke njoftuar se Albin Kurti ka refuzuar të takohet me të personalisht për ti përcjellë mesazhet e bashkësisë euroatlantike kundër Kosovës.
Postimi i Osmanit bën diferencë me qëndrimet e Albin Kurtit. Në raportimin e tij sot në Bruksel i dërguari i Bashkimit Evropian Lajçak ka veçuar qëndrimet e zonjës Osmani në raport me Albin Kurtin, duke thënë se është më bashkëpunuese.