Deputetja e Partisë Demokratike, njëherësh kryetare e Komisionit të Integrimit Evropian, Jorida Tabaku, thotë se procesi i integrimit në BE nuk duhet të jetë pronë e qeverisë dhe ku shumë pak zyrtarë të saj kanë informacione, përkundrazi duhet të jetë një proces gjithëpërfshirës, i hapur dhe transparent.
Në një reagim lidhur me takimin e sotëm për politikën ekonomike dhe monetare, i cili mbyll takimet dypalëshe të shqyrtimit të kapitullit të 3 me Shqipërinë, Tabaku tha se “deri më sot, Këshilli Kombëtar Integrimit (KKIE) nuk ka asnjë informacion mbi diskutimet. Zero raportime”.
“Një diskutim kombëtar duhet të nisë menjëherë, komunikimi efektiv mes strukturave përgjegjëse dhe Parlamentit duhet të nisin dhe shndërrojnë këtë proces në një prioritet”, tha Tabaku. Kapitulli i 3 mbulon fusha thelbësore për konkurrencën dhe rritjen gjithëpërfshirëse: sipërmarrjen, kapitalin njerëzor, doganat dhe ekonominë e bazuar në njohuri.