Pushtimi rus i Ukrainës ka intensifikuar më tej rivalitetin midis fuqive të mëdha dhe po e bën Zvicrën, vendlindjen e organizatave ndërkombëtare, një qendër për spiunazhin rus dhe kinez, sipas inteligjencës zvicerane.
“Rusia ka shkatërruar rendin e paqes të bazuar në rregulla të Evropës”, tha Shërbimi Informativ i Konfederatës Zvicerane (SRC) në raportin e tij vjetor të publikuar sot. SRC-ja është gjithashtu e ngarkuar me kundërzbulimin.
Kjo do të thotë se “forumet ndërkombëtare për promovimin e paqes dhe sigurisë kolektive, si OKB dhe OSBE kanë humbur përsëri efektivitetin e tyre dhe një rend i ri botëror i qëndrueshëm nuk është në horizont”, theksojnë shërbimet e inteligjencës zvicerane.
Kësaj i shtohet edhe tendenca “drejt një rendi botëror bipolar, i shënuar nga rivaliteti sistematik mes SHBA-së dhe Kinës”.
Prandaj, “aktivitetet e huaja të spiunazhit, kryesisht ruse dhe kineze, vazhdojnë të përfaqësojnë një kërcënim në rritje për Zvicrën”, nënvizojnë ata.
Për shkak të, ndër të tjera, rolit të saj si shtet pritës për shumë organizata ndërkombëtare, “Zvicra është, në shkallë evropiane, ndër vendet në të cilat numri më i madh i anëtarëve të shërbimeve të inteligjencës ruse janë vendosur nën mbulesë diplomatike”.
Vargu i spiunëve tregon se lufta e Rusisë kundër Ukrainës është me të vërtetë “aktualisht qendrore për mjedisin politik dhe të sigurisë të Zvicrës”, sipas shërbimit sekret zviceran, i cili ka rreth 450 punonjës.
Selia e OKB-së në Evropë është e vendosur në Gjenevë, si dhe selitë e shumë agjencive të OKB-së.
Qindra diplomatë gjithashtu takohen rregullisht atje për të marrë pjesë në sesionet e ndryshme vjetore të këtyre institucioneve, qoftë Konferenca e të Drejtave të Njeriut, e cila po mbahet tani, Asambleja Botërore e Shëndetësisë, apo edhe Konferenca Ndërkombëtare e Punës, duke ofruar kaq shumë mundësi për një spiun për t’u përzier me turmën, për të krijuar kontakte dhe për të mbledhur informacion në një qytet ku takohen edhe shumë liderë ekonomikë dhe politikë.
Mandati i Zvicrës në Këshillin e Sigurimit të OKB-së, duke filluar nga janari i vitit 2023 dhe për herë të parë në historinë e saj, “intensifikon kërcënimin e spiunazhit për zviceranët”, të cilët punojnë në punët e Këshillit të Sigurimit. Ata në mënyrë të pashmangshme bëhen objektiva të spiunëve.
Lufta në Ukrainë po e detyron gjithashtu SRC-në të interesohet në fusha ku nuk është fokusuar më parë, për të parandaluar Rusinë të anashkalojë ligjet që ndalojnë eksportin e armatimeve duke u mbështetur në kompanitë me bazë në Bashkimin Ekonomik Euroaziatik, por edhe në Turqi apo Indi, thekson edhe SRC.