Ambasadori i Spanjës në Shqipëri, Alvaro Renedo Zalba thotë se ai dhe familja e tij po e shijojnë shumë qëndrimin në Shqipëri dhe se e kanë shumë përzemërt vendin dhe shqiptarët. I ftuar në emisionin “Opinion”, amabsadori Zalba shprehet se Shqipëria është një vend me njerëz të mrekullueshëm, kulturë unike, peisazh dhe kuzhinë që të lë pa frymë.
Blendi Fevziu: Si ndiheni në Shqipëri?
Alvaro Renedo Zalba: Familja ime dhe unë po e shijojmë shumë këtë vend të jashtëzakonshëm. Njerëzit e mrekullueshëm, kulturën unike, peizazhin që të lë pa frymë dhe kuzhinën e jashtëzakonshme.
Blendi Fevziu: Kjo që po thoni është e vërtetë apo është një përgjigje diplomatike?
Alvaro Renedo Zalba: Nuk është fare diplomatike. Ky është realiteti. Nuk mund të ishim më të lumtur. Sinqerisht, familja ime dhe unë e kemi shumë përzemërt këtë vend dhe njerëzit e tij. Jemi shumë mirënjohës ndaj shoqërisë shqiptare dhe institucioneve shqiptare për mikpritjen e jashtëzakonshme dhe për mua ky vend na ka bërë të ndihemi vërtetë si në shtëpinë tonë.
Blendi Fevziu: Shqipëria ka qenë një surprizë për ju…
Alvaro Renedo Zalba: Në një farë mënyre po sepse jetova në Itali në vitet 1990 dhe e mbaj mend shumë mirë ardhjen e demokracisë në Shqipëri pas rënies së komunizmit dhe krizat e viteve 90’. Mbaj përshtypjet që më krijuan nga ajo periudhë. Tanimë, kur i kthehem pas asaj periudhe është e jashtëzakonshme të shikosh arritjet e Shqipërisë që nga ajo kohë.
Blendi Fevziu: Megjithatë, para se të vinit këtu, kishit ndonjë ide apo kishit vetëm atë ide nga koha juaj në Itali në vitet 1990?
Alvaro Renedo Zalba: Pata atë përshtypje dhe është e jashtëzakonshme të shikosh sot se sa shumë kanë ndryshuar gjërat dhe vendi ka ecur përpara. Shqipëria është një shtet anëtar i NATO-s, një shtet kandidat i BE-së duke përparuar me proçesin e integrimit, një lider brenda Këshillit të Sigurisë së BE-së, një shoqëri Mesdhetare plot ngjyra që e ka të rrënjosur thellë ndjenjën euroatlantike dhe një destinacion turistik që bëhet gjithnjë edhe më i njohur duke tërhequr më shumë njerëz.