Ambasadorja zvicerane në Shqipëri, Ruth Huber ishte e ftuar në programin “Rudina”, ku foli edhe për jetën e saj private. Ajo u kthye 26 vite pas në kohë për të na rrëfyer njohjen me bashkëshortin, Alfred Gugler.
“Jemi takuar në punë faktikisht, jemi njohur në punë sepse ai punonte në një organizatë jo qeveritare që kishte mandat në bashkëpunim për zhvillim dhe përmes një projekti të përbashkët, kur të dy kemi qenë në Zvicër jemi takuar në kuadër të atij projekti. Ka kaluar goxha kohë tashmë, 26 vjet tashmë nëse s’gabohem.”
Ambasadorja shton edhe çfarë i ka pëlqyer deri më tani nga Shqipëria dhe cila është shija që po merr nga vendi ynë.
“Në përgjithësi, e gjithë mikpritja është fantastike. Nuk është vetëm në letër, por e shohim kudo që shkojmë. Kemi parë shumë gjëra faktikisht, edhe me tim shoq kur shkojmë në fshatra, në qytete në disa raste për inagurime, për ceremoni të ndryshme, për projekte zhvillimore, ftohemi nga kryetarët e bashkive dhe gjithmonë ka gjëra shumë të bukura, ushqim fantastik dhe të shumëllojshëm. Ajo që na pëlqen më shumë është realisht peshku dhe ushqimet e detit që janë fantastike.”