Deputeti i PD-së, Ervin Salianji nxori detaje për median nga mbledhja sekrete e Këshillit të Rregullores Mandateve dhe Imunitetit që dha autorizimin për arrestimin e Arben Ahmetajt. Deputeti demokrat u shpreh se në dosjen e SPAK-ut kishte edhe emra të tjerë, mes tyre sekretari i përgjithshëm i PS-së, Damian Gjiknuri.
“Qëndrimi ynë ishte që duhet të kalojë nesër kërkesa në seancë, por u kundërshtua nga PS me pretekstin se duhet kohë. Raporti ynë u firmos nga të gjithë anëtarët e opozitës. Edhe nesër do të kërkojmë që të miratohet. Ky është një rast që ka shpërfaqur një rast të madh korrupsioni ku e gjithë qeveria është e përfshirë. Dhjetëra persona deputetë aktualë të PS-së dhe kryetarë bashkie janë të përfshirë. Edi Rama duhet të japë dorëheqjen. Duhet të kemi një qeveri të re për t’i krijuar kushte më të favorshme drejtësisë” tha ai.
Gjiknuri brenda dosjes? “Ka dhjetëra persona. Unë i kam pyetur prokurorët. Nuk bëhet fjalë vetëm për të por edhe ish-ministra të tjerë dhe funksionarë që nuk kanë mandat sot. Po ekziston edhe emri që përmendët edhe ashtu sikur janë edhe dhjetëra të tjerë, deputetë të sotëm. Ish-kryetarë bashkie, ministra, kryetarë bashkie që përmenden. Kaq mund të them” tha ai.