Kryeministrja e Serbisë Ana Brnabiç, do të jetë sot në Tiranë në kuadër të takimit informal që do të zhvillohet me liderët e Rajonit, të ftuar nga kreu i qeverisë shqiptare, Edi Rama.
Por në një intervistë për mediat serbe, ajo tha se me kryeministrin Rama do të diskutojë për nismën e Open Balkan. Sipas kryeministres së Serbisë, pavarësisht deklaratave, ajo mendon se Rama nuk është kundër nismës së Open Balkan, e shtoi se e ardhmja e kësaj nisme do të jetë më e ndritur.
“Pavarësisht disa deklaratave, nuk besoj se Rama është kundër nismës Ballkani i Hapur, mendoj se për këtë ka folur në konferencën e fundit për shtyp me presidentin e Serbisë, Aleksandar Vuçiç. Besoj se e ardhmja e saj është e ndritshme dhe e sigurt dhe që edhe vendet e tjera të rajonit t’i bashkohen kësaj nisme”, tha ajo në përgjigje të pyetjes së një gazetari për të ardhmen e Open Balkan, gjatë një takimi në Preshevë.