Ish-Prokurori, Eugen Beci nga studio e emisionit “Open”, foli për aferën e inceneratorëve. Ndërsa u ndal edhe te largimi i ish-zv.kryeministrit Arben Ahmetaj dhe tek dorëzimi i urdhër-arrestit për të nga ana e SPAK në polici, Beci tha se nëse Ahmetaj kërkon azil në vendin ku ndodhet dhe e fiton atë atëherë duhet të harrohet ekstradimi.
“Çdo ditë që kalon duhet theksuar se do duhet të operohet sa më shpejtë nga organet e drejtësisë. Pasi merr dokumentet e duhura Prokuroria e Posaçme do bëjë shpalljen në kërkim ndërkombëtar, e cila kërkon rreth 10 ditë. Nëse ndodhet në Britani, kemi një marrëveshje për ekstradimin, kështu që është i lehtë ky proçes. Nga Kanadaja nuk kemi një marrëveshje të tillë. Në rast se Ahmetaj arrestohet në Rumani, ai nuk ekstradohet pasi i bie që është shtetas rumun. Sipas aludimeve, nëse ka pasaportë rumune, që të jemi të qartë. Nëse bën kërkesë për azil dhe i pranohet, të harrohet proçesi i ekstradimit”, u shpreh Beci.
Nga ana e tij analisti Ergys Mërtiri deklaroi se Ahmetaj mund të ketë pasaportë rumune.
“Flitet se Ahmetaj mund të ketë një pasaportë rumune”, tha Mërtiri. Kujtojmë se pasditen e sotme, Gjykata e Posaçme Kundër Korrupsionit ka miratuar urdhër arrestin për Arben Ahmetajn.