Komisioni Qendror i Zgjedhjeve bën të ditur se procesi i votimit për zgjedhjen e kryetarit të bashkisë së Rrogozhinës po vijon normalisht. Sipas KQZ-së, të gjithë qendrat e votimit janë hapur në orën 07:00 dhe do të qëndrojnë të hapura deri në orën 19:00.
Sipas raportimeve në Komisionin Qendror të Zgjedhjeve në çdo qendër votimi, identifikimi elektronik i zgjedhësve po kryhet rregullisht. “Operatorët e pajisjeve elektronike të identifikimit të zgjedhësve janë në krye të detyrës dhe nuk ka asnjë problematikë apo vështirësi në përdorimin e identifikimit elektronik”, bën të ditur KQZ.
Në garë janë sërish Edison Memolla i Partisë Socialiste dhe Shkëlqim Hoxha i koalicionit opozitar “Bashkë Fitojmë”. Në votime ditën e sotme janë thirrur 33 mijë qytetarë të Rrogozhinës.