Presidenti i Serbisë, Aleksandër Vuçiç, inauguroi kilometrat e para të autostradës së paqes që pritet të kalojë nga Nishi për në Merdarë, Prishtinë, Tiranë dhe Durrës.
“Jam krenar që kjo autostradë do të na lidhë me shqiptarët”, u shpreh ai duke theksuar se tregtia mes Serbisë dhe Shqipërisë është rritur me 35 për qind në vitet e fundit.
Vuçiç shtoi se ky aks rrugor, të cilin e konsideroi si shtylla kurrizore e Ballkanit Perëndimor, do të jetë një ndër autostradat më të ngarkuara në 20 vitet e ardhshme. Në të njëjtin mendim ishte edhe ambasadori i Bashkimit Europian në Beograd, Emanuel Zhiufre (Emanuele Giaufret).
“Kjo rrugë do të lidhë jugun e Serbisë me rrjetin e Ballkanit Perëndimor dhe do të mundësojë qarkullimin e lirë të njerëzve, mallrave dhe kapitalit, nga Nishi përmes Prishtinës në Tiranë dhe më gjerë”, theksoi ai.
Presidenti serb shtoi se vendi i tij mund të humbasë shumë më tepër se Kosova, duke iu referuar ekonomisë. “Miliarda euro janë në lojë, BE-ja na ndihmon në masë të madhe, por më së shumti bazohet në stabilitetin financiar të vendit tone”, përfundoi Vuçiç.