E diela e 30 qershorit do të jetë një ditë e zakonshme për shqiptarët, shprehet ish deputetja e LSI-së Silva Caka. Ajo thotë se janë vetë shqptarët që nuk do të lejojnë të ndodhë ajo që opozita e quan “farsë”.
“E diela e 30 qershorit, për shqiptarët do të jetë një ditë e zakonshme, e cila nuk do të prodhojë farsën elektorale të rradhës. Vetë shqiptarët dhe opozita e bashkuar nuk do të lejojnë të ndodhë përsëri një tallje e tillë, pasojat e të cilës i vuajnë të gjithë më pas. Çdokush që pretendon se do kontribuojë në zhvillimin e një farse të tillë, do të mbajë përgjegjësi përpara qytetarëve dhe sa më të madhe t’a kenë peshën në këtë farsë, aq më e madhe do të jetë përgjegjësia që do të mbajnë përballë shqiptarëve”, është shprehur Caka në një intervistë për “Koha Jonë”.
Opozita kërkon shtyrje të zgjedhjeve vendore dhe zhvillimin e tyre bashkë me zgjedhje të parakohshme për pushtetin qendror, por vendi nuk ka një Gjykatë Kushtetuese. Për këtë Caka thotë se “Mungesa e Gjykatës Kushtetuese është një nga arsyet për të cilën qytetarët shqiptarë protestojnë. Sistemi i drejtësisë, i kapur kokë e këmbë nga qeveria dhe maxhoranca, po prodhojnë padrejtësi të një niveli të paparë më herët në Shqipëri. Siç e thashë më sipër, vullneti i mirë për të zhvilluar zgjedhje të lira e të ndershme, e bën çdo teknikalitet ligjor e praktik, të zërë një rol dytësor. Gjithsesi, ne tashmë e kemi thënë: kjo realizohet vetëm nëpërmjet një qeverie tranzitore, pa Edi Ramën kryeministër, e cila ka për qëllim krijimin e kushteve për të futur një herë e mirë në shina morale, ligjore dhe kushtetuese, proceset zgjedhore në Shqipëri”.
Ndërsa për protestën e radhës së opozitës, më 11 maj, dhe nëse do të ketë një përplasje civile, Caka thotë se nuk janë protestat qytetare që e shkaktojnë, por arroganca dhe ligësia e qeverisë.
“Përplasjet civile nuk vijnë si pasojë e protestave qytetare por si rezultat i shurdhërisë dhe vebërisë së qeverisjes, për të dëgjuar dhe parë aksionin qytetar. Çdo protestë, mbart një mesazh, i cili duhet dëgjuar me përgjegjshmëri nga ata të cilët kanë në dorë të reflektojnë e të zgjidhin kërkesat e mesazheve të protestuesve. Nëse i referohemi rasteve konkrete, lind natyrshëm pyetja: si do duhej të reagonin qytetarët që banojnë në zonën “Bregu i Lumit”, kur jo vetëm po u prishen shtëpitë, nuk po marrin dëmshpërblimin që u takon por edhe dhunohen nga policia, e cila ka për detyrë t’i mbrojë ata? Si duhet të reagojnë banorët e Astirit, kur shteti tregohet i padrejtë, gënjeshtar dhe i korruptuar, përpara kërkesave të tyre? Si duhet të reagojnë gjithë shqiptarët, kur gënjehen çdo ditë nga ata të cilët duhet t’u shërbejnë e të punojnë për interesin e Shqipërisë? Pra edhe një herë, nuk janë protestat qytetare ato që shkaktojnë përplasje civile por arroganca dhe ligësia e qeverisjes, e cila për fatin tonë të keq, ndodhet në nivelet më të larta të malinjitetit karshi shqiptarëve”, tha ajo.