Gazetari Adriatik Doçi është shprehur se SPAK duhet të hetojë pasurinë e djalit të ish-kryeministrit Sali Berisha, Shkëlzen Berishës.
Me anë të një postimi në rrjetin social “Facebook” Doçi shkruan se SPAK ka detyrimin ligjor dhe moral t’u shpjegojë shqiptarëve si u bë Shkëlzeni një nga njerëzit më të pasur pa punuar asnjë ditë.
Më tej ai shtoi se duke parë se si Shkëlzeni është bërë aksioner i pronave të mëdha në Tiranë dhe bregdet, sipas tij shpjegon edhe fakti se përse këta të opozitës nuk e prishin terezinë pas çdo humbje.
“Mirë dhëndri zë hollë që ngriti 19 kulla me 39 mijë euro, si trashëgimtar (i shpronësuar një herë) i 140 m2 tokë, po Shkëlzeni nga Viçidoli si u bë pronar me rreth 40 % i pronave të familjeve të mëdha në Tiranë dhe bregdet?!
Tani po e kuptoj se pse këta nuk e prishin terezinë pas çdo humbje. Fitojnë më shumë duke humbur!
SPAK ka detyrimin ligjor dhe moral t’u shpjegojë shqiptarëve si u bë Shkëlzeni një nga njerëzit më të pasur pa punuar asnjë ditë, por vetëm si i biri i Nongratës.
Me dosjen e Tigrit, SPAK tregoi se nuk i mungon as fuqia, profesionalizimi, as guximi, as teknikat e hetimit dhe as ndjenja e përgjegjësisë për besimin”, shkruan Doçi.