Në shkollat e vendit ekipet e kujdesit shëndetësor po vijojnë punën për pajisjen me kabinetet e reja dentare. Kryeministri Edi Rama ka publikuar në Facebook, foto nga kabinetet e reja dentare në shkolla, ndërsa siguroi se së shpejti do të zgjerohet rrjeti i kabineteve dentare në Gjirokastër, Krujë, Kukës, Vlorë, Fier, Lushnje, Lezhë, Mat, Dibër, Korçë dhe Berat.
“Teksa të vegjlit po shijojnë pushimet e gushtit, me ekipet tona të kujdesit shëndetësor, po punojmë për detajet e fundit, që në shtator të kemi gati kabinetet e reja dentare në shkolla”, tha Rama.
Kryeministri Rama u shpreh se “pas njësive të reja të dentistrisë në shkolla në Tiranë, Durrës, Elbasan dhe Shkodër bëhemi gati të zgjerojmë këtë shërbim me investimin e ri të Ministrisë së Shëndetësisë dhe Mbrojtjes Sociale në shkolla në Gjirokastër, Krujë, Kukës, Vlorë, Fier, Lushnje, Lezhë, Mat, Dibër, Korçë dhe Berat”.
Programi i Depistimit të Shëndetit dhe Kujdesit Dentar për fëmijët e grupmoshës 6-14 vjeç ofron depistimin periodik, edukim shëndetësor për ruajtjen dhe kujdesin e dhëmbëve si dhe shërbime konkrete, si fluorizimi, pastrimi i gurëzave si dhe trajtimet urgjente apo mjekimet e patologjive të indeve të buta.
