Pas regjistrimit të partisë së tij në Komisionin Qendror të Zgjedhjeve, Astrit Patozi bën të ditur përmes një statusi në Facebook se çel zyrtarisht fushatën për zgjedhjet e 30 qershorit.
“Ndaj ne pa humbur asnjë sekondë kohë shpallim sot fushatën kombëtare të anëtarësimeve në “Bindjen Demokratike”, e cila nuk do të pengojë përgatitjet tona për të shkuar në zgjedhje me kandidatë dhe lista këshilltarësh në të gjitha bashkitë e vendit”, shkruan Patozi duke postuar edhe adresën e selisë së partisë.
Kujtojmë që kreu i KQZ-së, Klement Zguri kishte rezerva për regjistrimin e këtij subjekti politik, duke dhënë dhe votën kundër.
Lexo edhe- “Bindja Demokratike” regjistrohet për zgjedhjet vendore, por kreu i KQZ-së ka rezerva
POSTIMI I PLOTË I PATOZIT
KRIJO BINDJEN TËNDE, BESO BINDJEN TËNDE, VOTO BINDJEN TËNDE!
“Bindja Demokratike” u zyrtarizua sot si parti konkurrente në garën elektorale të 30 qershorit. Vendimi i marrë nga KQZ do të thotë se praktikisht ne jemi në fushatë, pasi zgjedhjet vendore janë pothujase në prag.
Duke falenderuar edhe një herë të gjithë ata që e bënë të mundur finalizimin e këtij projekti politik, që nga firmëtarët, e deri tek mbështetësit e parë të saj, ne angazhohemi solemnisht për një fushatë modeste, të vendosur dhe qytetare, por mbi të gjitha për një rezultat dinjitoz më 30 qershor.
Me këtë rast, ne ftojmë çdo qytetar të këtij vendi, që mendon se Shqipëria po qeveriset keq e mos më keq për shkak të një sistemi të kalbur politik për t’iu bashkuar projektit tonë.
“Bindja Demokratike” do të jetë shtëpia e lirisë, porta e hapur për çdo shqiptar që beson tek vlerat dhe tek fuqia e saj.
Ndaj ne pa humbur asnjë sekondë kohë shpallim sot fushatën kombëtare të anëtarësimeve në “Bindjen Demokratike”, e cila nuk do të pengojë përgatitjet tona për të shkuar në zgjedhje me kandidatë dhe lista këshilltarësh në të gjitha bashkitë e vendit.
Mirësevini tek BINDJA DEMOKRATIKE për të ndryshuar Shqipërinë!
Adresa: Rruga e Elbasanit, Ndërtesa 5, Hyrja 2/1, TIRANË