Sektori energjetik në vend ka regjistruar një performancë pozitive. Prodhimi i energjisë ka pësuar një rritje të fortë me 37,8% në periudhën prill –qershor të këtij viti. Sipas të dhënave të Instat për shkak të reshjeve gjatë kësaj kohe rezerva ujore dhe prodhimi nga hidrocentralet arriti vlerën 2.269 Gwh nga 1.647 Gwh energji të prodhuar në tremujorin e dytë të vitit 2022.
Kjo bëri që nevojat për energji të plotësohen nga prodhimi vendas duke ulur blerjet e energjisë dhe duke rritur eksportet .Në raportin e INSTAT theksohet se Importi i energjisë elektrike shënoi një rënie me 46,5 % ndërsa Eksporti bruto i energjisë elektrike arriti vlerën 786 Gwh nga 415 Gwh duke shënuar një rritje me 89.4 %
Përtej rritjes së prodhimit të energjisë edhe konsumi gjatë kësaj periudhe ka qenë më i vogël krahasuar e një vit më parë
Përdorimi i energjisë elektrike nga konsumatorët, në tremujorin e dytë të vitit 2023, u ul me 3,5 %.. Në rënien e përdorimit të energjisë elektrike nga konsumatorët kanë ndikuar konsumatorët jo familjarë, ku kemi një ulje të konsumit të energjisë elektrike me 7,3 %, ndërsa energjia e konsumuar nga konsumatorët familjarë është rritur me 1,2 %.
Po ashtu edhe humbjet e energjisë elektrike në rrjet dhe në shpërndarje kanë pësuar një ulje të lehtë. Këto shifra janë tregues se sektori energjetik në vend ka krijuar qëndrueshmëri dhe nuk është ndikuar nga goditjet e tregjeve ndërkombëtare ku energjia preku çmime rekord.
PRODHIMI I ENERGJISË ELEKTRIKE
PRILL –QERSHOR 2023 2.269 GWh
PRILL – QERSHOR 2022 1.647 Gwh
EKSPORTI I ENERGJISË ELEKTRIKE
TREMUJORI I DYTË 2023 786 GWh
TREMUJORI I DYTË 2022 415 GWh