Kryebashkiaku i zgjedhur i Himarës, Fredi Beleri ka reaguar nga qelia për intervistën e kryeministrit Rama për median greke Kathimerini. Ai e cilëson si të vetëkërkuar këtë intervistë nga Rama, për të cilin thotë së më herët ka heshtur, ndërsa tani po jep intervista herë here për arrestimin e tij.
Sipas Belerit, tre janë motivet e ndryshimit të qëndrimit të Ramës. Mosmarrja e një ftese në darkën informale të Athinës zyrtare për Belerin ka shërbyer që Rama të kuptojë pasojat e prangosjes së tij.
“Intervista e vetëkërkuar e kryeministrit Edi Rama për KATHIMERINI, dalja e katërt publike e tij për rastin tim në 12 ditët e fundit, kur ndërkohë ai mbajti një heshtje peshku për 90 ditë rresht që nga arrestimi im, më çon në tre përfundime kryesore:
Së pari, filloi të kuptojë, pasi Athina e detyroi të mungonte në foton e madhe të liderëve të Ballkanit Perëndimor, pasojat e veprimeve të tij në procesin e anëtarësimit por edhe pozicionin ndërkombëtar të Shqipërisë në përgjithësi. Asnjëherë nuk është vonë.
Së dyti, vendosi të tregojë pendesë për sulmin publik shpifës dhe abuziv ndaj meje para zgjedhjeve por duke e bërë këtë artificialisht dhe me kujdes për të shkëputur përndjekjen time nga sulmi i tij dhe për të treguar se është lider autocensurues. Shpresoj që në një të ardhme të afërt të gjejë staturën politike për të bërë mea culpa, por ta nënkuptojë dhe ta vërtetojë në praktikë”, shkruan ai.
Ndonëse shprehet se Rama po kupton pasojat e veprimeve të tij, Beleri sërish e akuzon kryeministrin shqiptar për shtrembërim të realitetit.
“Së treti, ai vazhdon të shtrembërojë realitetin dhe të gënjejë. Shpresoj që ai të ketë rënë viktimë e dezinformimit dhe ta kuptojë herët, përpara se pasojat për Shqipërinë, Bashkinë e Himarës dhe mua personalisht të bëhen të pakthyeshme.
Kërkova nga redaksia e KATHIMERINI që të dielën e ardhshme, më 3 shtator, të pranojë një shkrim timin me rastin e intervistës së Edi Ramës. Nesër të rëndësishmet zoti Rama”, shkroi Beleri.
Kryeministri Rama ke deklaruar vazhdimisht se drejtësia funksionon njësoj për të gjithë, ndonëse Athina zyrtare ka kërkuar lirimin e kryebashkiakut të zgjedhur të Himarës. Ky i fundit u prangos nën akuzën për blerje votash, vetëm 48 orë para zgjedhjeve lokale.