Sali Berisha thotë se kryeministri Edi Rama me deklaratat për koncesionin e sterilizimit faktoi se ai dhe ish-ministri i Shëndetësisë, Ilir Beqja janë pronarët realë të vjedhjes së dytë të shekullit.
Në një deklaratë për mediat, Berisha tha se sterilizimi i ka kushtuar shqiptarëve deri sot 79 mln euro dhe ka rritur çmimin e sterilizimit, duke e bërë këtë proces 4 herë më të kushtueshëm se në Gjermani. Sipas tij, Rama mori një akt të hapur presioni ndaj gjykatës, e cila pasi njohu dosjen kërkoi anulimin e kontratës si vepër e mirëfilltë penale.
“Edi Rama sapo zbriti dje nga autobusi i BE-së apo aeroplani rus, nuk u mor vesh se cilin preferonte, faktoi në mënyrë përfundimtare se ai dhe Beqja i tij janë pronarët realë të vjedhjes së dytë të shekullit, ose inceneratorit të shëndetësisë. Rama provoi dje se ai me Beqjan e tij janë pronarët realë të vjedhjes së dytë të shekullit. Ai pas amnistimit të Beqjas, rendi dje të mbrojë me inskenime, dëshmitarë të rremë, statistika false veprën e tij të rëndë penale, sterilizimin që i ka kushtuar shqiptarëve sot 79 mln euro dhe ka rritur çmimin e sterilizimit, duke e bërë këtë proces 4 herë më të kushtueshëm se në Gjermani.
Doli dje si krimineli në vendin e krimit dhe mbrojti aferën e tmerrshme që i privoi 1000 të sëmurë me pasoja fatale për të sëmurët. Rama dëshmoi se sterilizimi është biznes i tij dhe Beqjat kurse investitori Rrapaj është Zoto i radhës. Rama mori një akt të hapur presioni ndaj gjykatës, e cila pasi njohu dosjen kërkoi anulimin e kontratës si vepër e mirëfilltë penale. Rama kishte si mesazh të prerë, mjerë ai që guxon të prekë pronën time për të cilën ai vetë është i aftë të bëjë çdo gjë që ta amnistojë siç amnistoi ortakun e tij Ilir Beqja”, deklaroi Berisha.