Gazetari dhe analisti, Arion Sulo i ftuar në rubrikën “Open” në News24, komentoi ndryshimet në qeveri, ku u ndal te largimi i ish-ministres së Jashtme, Olta Xhaçka. Sula tha se largimi i Xhaçkës ishte i pritshëm, teksa bëri një parashikim se çfarë do ndodhë pas ikjes së saj nga qeveria si ministre e Jashtme. Sipas analistit, ish-ministres do i hiqet mandati i deputetes.
“Largimi Xhaçkës ishte i pritshëm. Me këtë largim sot, Xhaçkës i paraprin heqja e mandatit të deputetes. Kjo lidhet me bashkëshortin e saj si investitor strategjik. Mirëpo, Rama këtu është në gënjeshtër, propagandë që nuk mban. Çështja është shtyrë 4-5 muaj nga PS me truke ligjore. Vetë Rama ia ka dhënë investitorin strategjik, bashkëshortit të Xhaçkës, si kryetar i qeverisë. Ku është mos përgjegjësia e tij? E ka firmosur atë”, tha Sulo.
Gjithashtu, gjatë bisedës në studio, Robert Rakipllari u shpreh se logjika e kryeministrit Edi Rama, është një logjikë menaxherësh dhe jo një logjikë prej profesionisti dhe këtë e ka treguar edhe me vendimet e tij.
Pjesë nga biseda:
Robert Rakipllari: Po largohet ministrja e shëndetësisë e cila ka qenë në qendër të akuzave. SPAK, sterilizimi apo edhe dy apo tre koncesione të tjera janë në hetim. Është larguar një ministre që realisht ajo vetë nuk ka një akuzë. Koncesionet janë bërë në kohën e Beqjës, por ky sektor është goditur nga SPAK, në këtë moment ka reputacion të keq. Në këtë situatë ka shkuar një figurë e re. Që në fillim Rama ka pasur logjikën e menaxherëve, ka vënë ministra që nuk kanë pasur lidhje. Logjika e Ramës është logjikë menaxherësh dhe jo logjikë profesionistësh. Përgjegjësitë politike i merr vetë, ndërsa përgjegjësitë për penale personale i kanë ata që i kanë. Ky lloj ndryshimi në ministrinë e Shëndetësisë e përkufizon të gjithë hallin për ndryshimin e imazhit.
Arion Sulo: Rama nuk ka dhënë as arsyet për ndryshimet e ndërmarra. Përveç Krifcës, që akuzohet për fondet e BE-së, tani të tjerat duket sikur janë pa sens. Për Manastirliun, tha që pati sukses në shëndetësi, nuk e marrim vesh përse e ndërron, ministren e Shëndetësisë?!
Robert Rakipllari: Po e çon tek Arsimi që të bëjë sukses edhe atje.