Në këtë periudhë regjistrimesh, jo vetëm maturantët janë në garë për arritur degët më të mira, por edhe universitetet mes tyre për të tërhequr studentët më cilësorë.
Fakultetet që kishin konkurs duket se ia arritën qëllimit. Mjekësia e Arkitektura i mbyllën regjistrimet në pak ditë. Drejt plotësimit të kuotave janë dhe degët e inxhinierisë dhe informatikës, ndër më të kërkuarat nga maturantët e këtij viti.
Kërkesat e tregut të punës vendas dhe të huaj për degët e inxhinierisë dhe informatikës kanë rritur dhe interesin e të rinjve për këto programe studimi. Ndërkohë që vitet e fundit diplomat e Universitetit Politeknik njihen edhe nga universitete europiane, ndërsa së shpejti hapet masteri i Inteligjencës Artificiale në bashkëpunim me universitete të huaja partnere.
Më 11 shtator mbyllet raundi i parë i regjistrimeve, për të nisur më pas fazat e tjera për plotësimin e kuotave bosh në degët që ende kanë vende të lira. Ndërsa më 2 tetor shkollat e larta fillojnë vitin e ri akademik.