Çështja “Beleri” ka shkuar deri në Amerikë. Kryeministri Edi Rama thotë se Shqipëria është shembull i veçantë i mos abuzimit me komunitetet etnike, ndërsa komentoi sërish çështjen Beleri, pas mesazhit nga Departamenti Amerikan i Shtetit. “Shqipëria kurrë nuk ka nxitur trazime etnike as në shtetet fqinje, as mes shteteve fqinje, duke prekur ndjenja që mund të ushqejnë kundërshti e të ndezin konflikte”,-shkruan Rama në një postim të gjatë në Facebook.
Kreu i qeverisë shkruan edhe se askush nuk duhet t’i nënvlerësojë shqiptarët dhe “të na marrë për qorra, shurdhë apo memecë”, nisur nga pjesa që ne japim besim, respekt dhe miqësi. Ai theksoi se mirëpresim kritika për t’u përmirësuar nga gjithkush, por jo leksione bashkëjetese dhe respekti për etnitë e tjera.
“Nuk ka dyshim se disa rreth e rrotull, po edhe disa prej aleatëve e partnerëve tanë ndërkombëtarë e marrin nganjëherë si diçka të zakonshme, të mirëqenë e për këtë arsye thuajse të parëndësishme, qasjen tonë emancipuese për ndërtimin dhe ushqyerjen e marrëdhënieve miqësore me të gjithë. Jo se kjo na bën të dyshojmë në këtë qasje tonën, e cila është një qasje sa pragmatike aq edhe thelbësisht vlerore, për një bashkësi europiane si e jona në Shqipëri, po ja që në ndonjë rast apo moment u duhet kujtuar të gjithëve se ne japim besim, respekt, miqësi, por askush asnjëherë nuk duhet të na marrë për qorra, shurdhë apo memecë. Ne mirëpresim kritika e ndihmë për t’u përmirësuar nga gjithkush, po leksione bashkëjetese e respekti për etnitë e tjera Shqipërisë nuk i jep dot askush”, shkruan më tej Rama.