Ministri i Brendshëm, Taulant Balla ka reaguar për aksionin e IKMT dhe Policisë së Shtetit për prishjen e ndërtimeve pa leje në një nga zonat më luksoze të kryeqytetit në Rolling Hills.
Balla ka paralajmëruar se nuk do të ketë tolerancë për askënd, dhe se katet e konfiskuara do të shkojnë për strehim social apo për mjedise pune për institucionet publike.
“Vijon aksioni i Policisë së Shtetit dhe IKMT kundër ndërtimeve, shtesave pa leje dhe çdo shfaqje tjeter abuzive. Kush nuk ka vënë mend nga kjo histori, duhet të kuptojë se nuk ka tolerancë për askënd dhe ne do të rrisim vigjilencën e Policisë së Shtetit dhe agjencive të tjera ligjzbatuese për identifikimin, penalizimin, shembjen apo konfiskimin për interes publik të të gjitha sipërfaqeve në pallate, qendra biznesi, hotele të ndërtuara në shkelje të ligjit. Të gjitha katet e konfiskuara do të shkojnë për strehim social apo për mjedise pune për institucionet publike”, tha Balla.