10 Tetori është Dita Botërore e Shëndetit Mendor. Askush nuk është imun nga problemet e shëndetit mendor.
Burra, gra, fëmijë, adoleshentë, të pasur e të varfër, të pushtetshëm apo të papunë, të shkolluar ose jo, e rëndësishme është të kërkosh ndihmë. Referuar Organizatës Botërore të Shëndetësisë në botë 1 në 8 persona vuajnë probleme të shëndetit mendor. Ndërsa përsa i përket vendit tonë, pas tërmetit të 2019-tës dhe pandemisë së Covid 19, numri i personave që kërkuan ndihmë u rrit në mënyrë të ndjeshme. Referuar INSTAT-it në 4 mujorin e parë të vitit 2022, u rrit me 50 % numri i të prekurve me ankth dhe depresion.
“Në 4 vitet e fundit është rritur numri i profesionistëve të atashuar në të gjitha hallkat ku qasen qytetarët. Ka psikologë që nga çerdhet, kopshtet, shkollat, Qendrat e Shëndetit Mendor, Qendrat Spitalore dhe së fundmi edhe nëpër ambulancat e lagjeve që është porta e parë e pritje së pacientit. Ne vendosëm që në këtë ditë të ekspozojmë Fjongon Jeshile, që është edhe simboli i kësaj dite, në disa nga linjat kryesore të autobusëve të Tiranës, si linja e Porcelanit, ajo e Kombinatit dhe e Unazës. Pikërisht për faktit që këto linja përdoren nga shumë njerëz të thjeshtë që nuk duhet t’u mungojë informacioni dhe shërbimi. Është një mënyrë për të sensibilizuar që të kthehen sytë nga shëndeti mendor“, thotë Valbona Treska, Urdhri i Psikologëve të Shqipërisë.
“Te ne ka akoma është tabu, frikë dhe paragjykim që të shkohet tek specialisti i shëndetit mendor. Në Itali ku unë jetoj shkojmë pa problem fare, pasi është gjëja më e bukur. Lehtëson shpirtin dhe rimerr fuqitë për të përballuar ngarkesën e jetës“, shprehet një qytetar.
“Unë nuk kam shkuar ndonjëherë tek psikologu, pasi kam punuar fort me veten. Por nuk ka asnjë problem që kur ndihesh i dobët dhe i brishtë, të kërkosh ndihmë. Sikurse shkojmë tek kardiologu, mjeku i veshkave, i syve, i mushkërive, shkohet edhe te psikologu”, thotë një tjetër.