Presidenti Hashim Thaçi në Samitin e Berlinit u shpreh se dialogu Kosovë-Serbi aktualisht është i bllokuar dhe sipas tij roli i SHBA-së është i rëndësishëm dhe vendimtar në këtë dialog.
“Së pari, Serbia ka kushtëzuar vazhdimin e dialogut me heqjen e taksës për prodhimet serbe të vendosura nga Kosova”, ka thënë presidenti Thaçi.
Sipas tij, faktori ndërkombëtar nuk ka dëshmuar unitet dhe përkrahje për përpjekjet tona për marrëveshje gjithëpërfshirëse, dhe se ka pasur qëndrime kundërthënëse dhe vështirësi të mëdha në themelimin e Ekipit Negociues gjithëpërfshirës në Kosovë.
Presidenti Thaçi tha se një marrëveshje gjithëpërfshirëse finale mund të arrihet në rast se shtetet e kryesore europiane, nuk do të jenë në unison.
‘Për më tepër, ju të gjithë e dini se marrëveshja është e pamundur pa rolin vendimtar të SHBA-ve’, ka shtuar Thaçi. Ai po ashtu ka thënë se shtetet fqinje në rajon, nuk kanë rezultuar mbështetëse ndaj përpjekjeve të Kosovës në dialogun me Serbinë .
Thaçi u shpreh se pavarësisht faktit se kur do të arrihet një marrëveshje ndërmjet Kosovës dhe Serbisë, demarkimi i kufirit ndërmjet të dy shteteve është i pashmangshëm.