Shuhet në moshën 88 vjeçare Ferit Hysa, ish specialist dhe drejtues i klubit të futbollit “31 korriku”, Burrel.
Aktivitetin sportiv Hysa e nisi në Tiranë, në shkollën “Ndrec Ndue Gjoka” për ta vijuar si mësues në zonën e Derjanit dhe Bruçit.
Shtatorin e vitit 1958 emërohet në ish seksionin e arsimit Mat dhe tri vite më vonë mësues në shkollën “31 korriku” Burrel. Në 1962 Ferit Hysa u emërua drejtues i kulturës fizike dhe sporteve për rrethin e Matit. 1980 i besohet drejtimi i skuadrës së futbollit. Pas një viti Hysa caktohet shefi i klubit. Prej vitit 1981 deri 1992 skuadra e Matit spikat në sportin e futbollit. Meritë për këtë kishte sigurisht edhe Ferit Hysa.
Për 40 vite Ferit Hysa spikati me profesionalizmin, korrektësinë dhe dashurinë për zhvillimin e sportit në trevën e Matit.
Vite më parë ai botoi historikun e futbollit në Mat. Sakaq Pallati i Sportit në qytetin verilindor mban emrin e tij.
