Sali Berisha nga Lushnja akuzoi kryeministrin Edi Rama, të cilin e quajti si rrezikun më madhor të Shqipërisë pas Enver Hoxhës.
“Edi Rama është rrezik madhor, rreziku më i madh pas Enver Hoxhës. A do ulim ne kokën para këtij rreziku? Kurrë jo! Përkundrazi do ngrihemi fuqishëm në një betejë pa kthim, në një betejë në emër të shpresës, demokracisë, të ardhmes. Në një betejë që ne do ta fitojmë”, tha Berisha.
Ish-kryeministri komentoi edhe masën e sigurisë të marrë nga Gjykata e Posaçme ndaj ish-ministrit të Shëndetësisë, Ilir Beqaj për aferën me sterilizimet.
Berisha tha se Beqaj ka përgjegjësi për abuzimin, por e konsideroi thjesht një vegël të kryeministrit Rama.
“Ilir Beqaj është hajdut dhe ka përgjegjësi, por është thjesht një vegël e Edi Ramës, një shërbëtor i tij. Nga studio në studio dilte Rama, me gërshërë bisht-thyer dhe thoshte ‘ja me se operoheshin qytetarët’. Donte të mbulonte vjedhjen. Është Edi Rama ai që donte të mbulonte vjedhjen e tmerrshme me sterilizimin. Kostot u rritën 83 herë.”