Përgjimet e SKY dhe arrestimet e bujshme të ditëve të fundit ku zyrtarë apo ish-zyrtarë të lartë të Polisë së Shtetit janë kapur në lidhje me eksponentë të botës së errët të krimit, në vlerësimin e gazetarit Elton Qyno është një “Metamorfozë e Dytë” e përmasave të lidhjes së krimit me shtetin.
Në një bisedë në studion e lajmeve, Qyno u shpreh se kemi të bëjmë me një operacion të SPAK-ut në një ndërhyrje të tipit “Metamorfozë 2”.
Nga ana tjetër, Qyno vlerësoi kontributin e drejtësisë së Francës dhe Blegjikës për të realizuar dhe zbardhjen e të gjitha bisedave.
“Flitet për emra të njohur të botës së krimit, ku sërish edhe në këtë dosje del se është sërish Nuredin Dumani, që është njeriu kryesor i çështjes që SPAK ka arritur që të godasë 4 grupe kriminale në Shqipëri, por që edhe në këtë çështje del sërish ky individ si njeriu që do realizonte vrasjet e dy vëllezërve Nela.
Dumani është një personazh që e ka futur për herë të parë SPAK-u në lidhjet e tij me aplikacionin “Sky”, përmes telefonit që iu sekuestrua atij në momentin e arrestimit, duke vërtetuar dhe lidhje të tij për ngjarje të tjera.
Po ashtu, ka pasur dhe bashkëpunim edhe nga institucionet belge dhe franceze. Dumani është njeriu që mban kontakte me Bujar Germizin, dhe është ky njeriu që i ka dërguar fotot e vëllezërve, që Dumani t’i ekzekutonte si në Kosovë, apo në Shqipëriu, kudo që të gjendeshin ata.
Erzen Breçani faktikisht ishte surpriza e këtij operacioni, pasi ai ka arritur gjatë kësaj kohe të krijojë një figurë shtetare qoftë edhe në daljet e tij në ekrane, ku ai u kthye edhe në një analist të çështjeve të botës dhe ngjarjeve kriminale.
Në fakt, Breçani akuzohet për përkrahje të autorëve të krimit dhe atë të pastrimit të të ardhurave që lindin nga të ardhurat e produkteve të veprave kriminale.
Pasi Erzen Breçani akuzohet që paratë që vinin nga veprimtaria kriminale e të birit përmes trafikut të drogës, por edhe krushku i tij, Ervin Mata, ku një pjesë e këtyre parave dërgoheshin në Shqipëriu dhe investoheshin në hidrocentrale apo edhe në biznese të ndryshme”, u shpreh ndër të tjera, gazetari Elton Qyno.