Kryeministri i Kosovës, Albin Kurti këtë të martë ka folur për vrasjen e Liridona Ademajt në Prishtinë dhe kidnapimin e më pas vrasjen e 14-vjeçares Vanja Gjorçevska, në Shkup. Me kërkesë të familjes, trupi i Liridonës është zhvarrosur nga varrezat e fshatit Cërmjan dhe të hënën është rivarrosur në fshatin Rracaj të Gjakovës. Kurti e ka quajtur akt të drejtë rivarrimin 30-vjeçares, e cila u vra mbrëmjen e 29 nëntorit në Prishtinë.
Po ashtu Kurti ka thënë se zbardhja e plotë e rastit të Liridonës është drejtësi dhe se “i drejtë presim të jetë dënimi, pra maksimal”. “Dhuna ndaj grave është fenomen global e i lidhur edhe me valën në ngritje të ekstremit të djathtë. E megjithatë është një dozë edhe më e thellë e dhembshurisë kur femicidi shfaqet në një shoqëri edhe pas mbijetimit kolektiv të gjenocidit”, është shprehur kryeministri.
Kurti tha se vrasja e porositur e Liridona Ademajt nga burri i saj dhe rrëmbimi i 14-vjeçares në Shkup kanë renduar mendjet dhe zemrat e të gjithëve. Ai ka thënë porositësit dhe kryerësit e rastit të Liridona Ademajt janë kapur e vënë prapa grilave, por thotë se vetëm arrestimi nuk mjafton.
“Vrasjet e fundit, vrasja e porositur e Liridona Ademajt nga burri i saj dhe kidnapimi nga shkolla e më pas edhe vrasja e 14-vjeçares në Shkup, na ka rënduar mendjet dhe zemrat tona. Porositësit dhe kryerësit e rastit të Liridonës janë zënë e janë vënë prapa grilave. Policia syçelë si kurrë njëherë po vepron shpejt e me efikasitet të lartë. Por, nuk po mjafton vetëm arrestimi i kriminelëve”.