Ish-prokurori Eugen Beci thotë se që në fillim nuk e ka besuar versionin e grabitjes të dhënë nga Naim Murseli, i cili pagoi për të vrarë gruan e tij, Liridona Ademaj. I ftuar në emisionin “Open”, Beci sqaroi se grabitësit asnjëherë nuk rrezikojnë të përdorin armën e zjarrit. Po ashtu ai foli edhe për tre tipologji autorësh, të cilët kryejnë krime në familje.
“Vetëm çfarë dëgjova nga lajmet e Kosovës, menjëherë krijova bindjen që nuk ishte grabitje, kjo është e sigurt. Sepse grabitësit, autorët e vjedhjeve me armë asnjëherë nuk rrezikojnë të përdorin armët e zjarrit. Arma e zjarrit në një grabitje përdoret në akte ekstreme. Fakti që personi duhet të reagonte në vendngjarje u largua me fëmijët ka diçka që nuk shkon në atë ngjarje. Janë disa gjera që kërcasin nga pikëpamja e kronologjisë së ngjarjes.
Ngjarjet e vrasjeve në familje kanë 3 tipologji autorësh. Tipologjia e parë e autorëve janë ata që pendohen menjëherë pasi kryejnë vrasjen. Policia gjen një të vrarë dhe një të vetëvrarë.
Rasti i dytë, pendohen por nuk kanë guximin të vrasin veten dhe i dorëzohen policisë me armën e krimit në dorë.
Rasti i tretë kur autorët tentojnë të viktimizohen, si në rastin konkret, që thonë se isha edhe unë viktimë. Ky rast i fundit në vrasjet në familje ndihmon organet ligjzbatuese që ti zbulojnë ngjarjet”, tha ndër të tjera Beci.