Vrasja e Liridona Ademajt e cila tronditi opinionin publik në Kosovë e Shqipëri, do të hetohet nga një prokurore serbe. Mësohet se rasti i është dhënë prokurores Javorka Perlinçeviç, pasi në fazën fillestare u hetua nga prokurorja Besa Limani e cila del në pension së shpejti.
Caktimi i Perlinçeviç si prokurore për rastin është bërë nëpërmjet shortit me rradhitje. Sipas mediave të Kosovës, prokurorja nuk ka pasur ndonjë rast madhor për të hetuar gjatë karrierës së saj.
Nacionale shkruan se ndër çështjet e hetuara nga serbja, vlen të theksohet vrasja e një personi te nënkalimi në Prishtinë. Aty një i dyshuar pas një sulmi fizik, e kishte shtyrë shkallëve viktimën, i cili nga goditjet kishte vdekur. Prokurorja serbe e kishte cilësuar veprën si “Vrasje nga pakujdesia”. I dyshuari ishte dënuar me 4 vjet e 8 muaj burg, shkruan “Nacionale”.
Perlinçeviq jeton në Shtërpcë, kurse provimin e Jurisprudencës e kishte kaluar në Beograd. Ajo punon si prokurore që nga viti 2012.
Për vrasjen e Liridona Ademajt në 29 nëntor në Prishtinë, të arrestuar po mbahen Naim Murseli (bashkëshorti i saj) i cili dyshohet si organizator si dhe Kushtrim Kokalla e Granit Plava, bashkëpunëtorët e tij për vrasjen e të resë. Gjithashtu në 9 dhjetor, një person i katërt u arrestua, pasi dyshohet se i ka shitur armën Naim Musrelit dhe Garnit Plavës, me të cilën është vrarë Liridona. Bëhet fjalë për Tomë Dodaj. Të katërt janë shpërndarë në burgje të ndryshme. Ndaj Plavës së fundmi ka pasur një tentativë sulmi nga të burgosurit.