Gjykata e Posaçme u detyrua të shtynte për më 8 janar seancën gjyqësorë ndaj Rezart Taçit, biznesmenit të akuzuar nga SPAK për përfshirje në përpjekjen për pastrimin e 18.3 milionë eurove të mafias italiane.
Procesi ndaj biznesmenit ishte pezulluar për një vit për shkak se ai nuk është gjetur për t’u arrestuar në zbatim të një mase sigurie “arrest në burg” dhënë në mungesë ndaj tij. Seanca e së hënës u shty për shkak të mosnjoftimit të Taçit për procesin. Po ashtu, gjykata vendosi të bëjë njoftim me shpallje publike për gjyqin ndaj biznesmenit në kërkim.
Në këtë proces, Taçi akuzohet për “pastrim parash” dhe “grup të strukturuar kriminal“.
Më herët, në një proces të veçuar Gjykata e Posaçme dhe Apeli kanë fajësuar Bledar Lilon dhe Artur Ballën si ndihmës të tij në pastrimin e parave të transferuara nga Italia në llogari të vetme në një bankë të nivelit të dytë në Shqipëri.
Balla u dënua me 7 vjet e 4 muaj burg, ndërsa Lilo me 6 vjet e 8 muaj. Në të njëjtin vendim, i cili ka marrë formë të prerë, gjykata ka konfiskuar duke kaluar në llogari të shtetit 18.3 milionë eurot.