Anëtar i kryesisë së PD, Bardh Spahia, ka reaguar mbi vendimin e fundit të GJKKO për lënien në arrest shtëpie, të kreut demokrat Sali Berisha.
Këtë vendim, Spahia e cilëson se një vendim të derigjuar politikisht.
Përmes një postimi në llograinë e tij në rrjetin social ‘Facebook’, Spahia thekson se:
“Askush prej nesh nuk mund të ketë një jetë të mirë për vete dhe familjen, kur shteti i së drejtës ka rënë, pluralizmi po synohet të zëvendësohet me partinë-shtet dhe demokracia me diktaturën e bandave”, shkruan Spahia ndër të tjera.
Postimi i plotë i Spahisë:
Idetë as nuk burgosen, as nuk eliminohen! Akti kundër Sali Berishës nuk i përket një drejtësie të pavarur, por një drejtësie të dirigjuar politikisht.
Pa prova, pa fakte, pa i marrë kurrë një dëshmi, me procedura antikushtetuese dhe antiligjore, dosja e sajuar kundër Sali Berishës përbën një gur në qafë për çdo shqiptar, demokrat, socialist apo pa parti.
Ky standard antidemokratik do t’i trokasë në derë kujtdo nesër, por do të jetë vonë, nëse nuk e ngremë zërin sot.
Askush prej nesh nuk mund të ketë një jetë të mirë për vete dhe familjen, kur shteti i së drejtës ka rënë, pluralizmi po synohet të zëvendësohet me partinë-shtet dhe demokracia me diktaturën e bandave.
Si demokratë, ne e kemi të qartë betejën tonë: asnjë hap pas!