Ish-ministri i Shëndetësisë, Ilir Beqaj dëshmoi këtë të premte për gati tre orë e gjysmë në Prokurorinë e Posaçme Antikorrupsion. Ai u pyet sërish për koncesionin e sterilizimit, në kohë kur drejtonte Ministrinë e Shëndetësisë. Pas daljes nga SPAK, ai foli për gazetarët.
“Edhe sot u paraqita në cilësinë e personit nën hetim për çështjen e sterilizimit. Kam qenë në dispozicion të hetimeve. Sot vazhduam me pyetjet për sterilizimin. Diskutuam dhe për gazin, madje dhe për aneksin 8. Aneksi 8 është pjesë e dokumenteve standarde të tenderit”.
Beqaj komentoi edhe makinën që është hetuar nga SPAK si mjet i përfituar nga korrupsioni dhe i deklaruar në mënyrë të rreme në emër të shtetasit Ermal Kurtulaj, vartës i Beqajt në SASPAC. Para gazetarëve, Beqaj tha se nuk ka fare leje drejtimi dhe në SPAK vjen me avokatin e tij.
“Kam ardhur me ndihmën e avokatin, me automjetin e famshëm luksoz, të parkuara aty. Lidhjen time me Ermalin e kam thënë. Unë nuk di t’i jap makinës, s’kam leje drejtimi”, u shpreh ai.