Nënkryetarja socialiste e Kuvendit, Ermonela Felaj, në një intervistë televizive është treguar e prerë me opozitën ku u shpreh se mazhoranca nuk do të bëjë as edhe një negociatë apo kompromis me opozitën në parlament për komisionet hetimore, ajo shtoi më tej se kërkesa e opozitës për ndryshimin e ligjit për komisionet hetimore nuk shkel asnjë rend kushtetues.
“Partia Socialiste nuk ka ndërmend të bëjë ndonjë negociatë apo kompromis me opozitën në parlament për komisionet hetimore, që përbën një nga arsyet kryesore pse opozita ka ndërmend të vazhdojë protestat për të bërë të pamundur një jetë normale parlamentare. Komisioni Europian ka kërkuar dialog brenda parlamentit, por unë nuk e kuptoj si një ftesë ndaj maxhorancës, por si ftesë ndaj palëve. Dhe palët duhet të pozicionohen në mënyrë të tillë që të vendosen në kushte dialogu. Por dialog nga frëngjitë dhe istikami nuk besoj se bëhet.
Ndërsa sa i përket ligjit për komisionet hetimore, nuk kam asnjë dyshim, sepse nuk ka asnjë moment aty që ta bëjë ligjin antikushtetues. Jam 100% e sigurtë për përmbajtjen e ligjit dhe nuk pres që të ketë surpriza nga Presidenti.
Ky ligj, si çdo ligj tjetër, do të kalojë atë filtër që përcakton Kushtetuta dhe këtu PS nuk ka si të vendosë pengesë ndaj Presidentit, Gjykatës Kushtetuese dhe kujtdo tjetër”- theksoi Ermonela Felaj. Nënkryetarja e Kuvendit tha se nuk kishte dijeni për një informacion sipas të cilit Departamenti i Shtetit i ka shprehur rezerva autoriteteve më të larta qeveriëse për ndryshimet në ligjin për komsionet hetimore.”, tha Ermonela Felaj.