Eduard Zaloshnja
Gjysma e banorëve të rritur urbanë të Tiranës janë të ardhur; treçereku i kanë prindërit të ardhur. Vjet dizenjova dhe drejtova një vrojtim statistikor socio-ekonomik në territorin e Bashkisë Tiranë (urban e rural). U anketuan 1128 banorë të rritur, të shpërndarë në mënyrë proporcionale në të gjithë territorin e bashkisë, për ta përfaqësuar popullsinë e rritur sa më mirë nga pikpamja gjinore, moshore, dhe gjeografike.
Vjet Bashkia Tiranë kishte rreth 581 mijë banorë të rritur (18 vjeç e sipër), nga të cilët rreth 484 mijë banonin në zonat urbane (në 11 minibashkitë origjinale dhe në zonat urbane rreth tyre). Pikërisht për këta banorë të rritur urbanë të Tiranës, po paraqes këtu një foto demografike me numra të llogaritur përmes vrojtimit statistikor të sipërcituar.
Për t’u veçuar është gjetja se gjysma e zgjedhësve urbanë të Tiranës ishin të ardhur nga rrethe të tjera, ndërsa treçereku i kanë prindërit të ardhur nga rrethe të tjera. Ndër të ardhurit, dominojnë ata nga rrethet e jugut (shihni tabelat më poshtë).
