Jetnor Zhaboli u arrestua dy ditë më parë nga Policia e Tiranës, sepse e kishte kthyer shtëpinë në burg për vajzën dhe dy gratë e tjera. Bashkëshortja e Jetnor Zhabolit kishte shkruar edhe një letër lamtumire duke menduar t’i jepte fund jetës.
Në porcesverbalin e mbajtur nga oficeri i Policisë Gjyqësore, evidentohet se nga kontrolli apartamentit, në dhomën e gjumit është gjetur një valixhe e cila është hapur me kod nga 35 vjeçari. Në të janë gjetur disa letra me shkrime dorë, të cilat theksohet se kishin përmbajtje të forta emocionale.
Letra
“Më fal **** dhe **** s’mund të shkruaj shumë. Babi, nëna, gjyshi, halla, daja do t’ju flasin shumë për mamin. Do ju dua shumë edhe pse po ju lë. Bedri, Gela, Baci më falni por kurrë mos ndjeni turp për mua, s’ju turpërova kurrë.
Mami, babai, Tina faleminderit për gjithçka. Nori të dua shumë. Ky ishte gabimi im. Ju dua shumë nëse më doni dhe ju amanet fëmijët dhe duheni shumë njëri-tjetrin të gjithë. Asnji nuk ka faj për fundin tim, nuk e përballoj dot këtë stres”, shkruhej në letrën që gruaja e 35 vjeçarit kishte shkruar.
Gjetja e kësaj letre në valixhen e Jetnor Zhabolit ka komplikuar dhe më tepër pozitat e tij me autoritetet.
Përmbajtja e saj është bërë shkak që Prokuroria e Tiranës të ngrejë ndaj tij veç akuzës “Dhunë në familje” dhe akuzën tjetër për “Shkaktim të vetëvrasjes i mbetur në tentativë”. Gruaja e 35 vjeçarit ka tentuar t’i japë fund jetës dhe ky është një dokument sipas autoriteteve, që e provon.