Gazetari Arbër Hitaj ka debatuar me kreun e grupit Parlamentar të Partisë Demokratike, Gazment Bardhin në studion e emisionit “Now me Erla Mëhillin”, lidhur me “paktin” që ka çuar në bashkimin e ndodhur mes “Rithemelimit” dhe grupit të Bardhit.
Hitaj iu drejtua Bardhit duke i thënë se ai ka bërë një marrëveshje me Berishën, për të qenë kandidati për kryeministër në zgjedhjet e ardhshme parlamentare.
Por nga ana tjetër, Bardhi e hodhi poshtë këtë gjë, duke thënë se i vetmi pakt që ai ka bërë me Berishën, është lufta pa kompromis kundër kryeministrit Edi Rama.
Pjesë nga diskutimi në studio:
Hitaj: Zoti Bardhi, e keni bërë një marrëveshje, paktin me Berishën e keni bërë.
Bardhi: I vetmi pakt që kam unë me Berishën është lufta ndaj Edi Ramës. Mund të mos u pëlqejë disave, por…
Hitaj: Luftë për të qëndruar në opozitë sërish?
Bardhi: Jo mo jo, luftë për të mundur Edi Ramën. Rama është një autokrat që po përpiqet të shuajë opozitën, e trajton popullin opozitar si armiq.
Hitaj: Ose jeni naiv politikë, ose po gaboni për herë të dytë. Herën e parë Basha ua hodhi, thatë u shit te Rama.
Bardhi: E vetmja këshillë që kam pasur për Bashën, është që t’i kthehet opozitarizmit.
Hitaj: Kanë bërë pakt dhe nuk na i thonë.
Bardhi: Po mirë ti ke qenë në takim me ne?
Hitaj: Pakti është që iu do të jeni kandidati për kryeministër në rastin më të mirë dhe në rastin më të keq, do të jeni në listë të sigurtë.
Bardhi: Nuk kam bërë kurrë betejë për të qenë në listë të sigurtë.