Ditën e djeshme, gjatë konferencës për shtyp me sekretarin Amerikan, Antony Blinken, kryeministri Edi Rama ndër të tjera tha edhe se “çdo sulm ndaj Kosovës është sulm ndaj Shqipërisë”. Presidenti i Serbisë, Aleksandar Vuçiç nuk ka vonuar dhe ka komentuar këtë deklaratë, ku thotë se është e tmerrshme.
“Sot u dëgjua nga një shtet fqinj se nëse dikush sulmon Kosovën, edhe pse nuk e di kush do të sulmonte, Shqipëria nuk do ta lejojë dhe do të jetë në atë anë. Pas një deklarate kaq të tmerrshme, dëgjohej vetëm një heshtje e madhe, aq e fortë saqë heshtja ishte e pakëndshme. Askush nuk iu përgjigj deklaratave të tilla, imagjinoni sikur dikush nga ne ta kishte thënë këtë, do të kishit dëgjuar bubullimat e mallkimeve, fyerjeve dhe fushatave më të pista nga e gjithë bota”, tha Vuçiç.
Vuçiç deklaroi se Serbia do të mbrojë marrëdhëniet e saj me Evropën, por edhe se nuk do të shkelë marrëdhëniet e saj me Rusinë apo Kinën. “Për sa na përket neve, nuk kemi nevojë të sulmojmë askënd dhe nuk do ta bëjmë. Ne kemi nevojë për Evropën, ndoshta jo hipokrizinë e saj, por nuk mund të bëjmë pa të”, tha Vuçiç.