Komisioni i Ligjeve miratoi këtë të martë në një mbledhje online, projektligjin për Amnistinë Penale. Drafti i propozuar nga Këshilli i Ministrave mori vetëm votat e deputetëve të mazhorancës. I vetmi përfaqësues i opozitës që u bë pjesë e seancës së komisionit ishte Enkelejd Alibeaj, i cili kërkoi më shumë kohë për shqyrtimin e amendamenteve të paraqitura nga deputetët e maxhorancës. Ministri i Drejtësisë, Ulsi Manja, tha se përfitojnë 700 persona të dënuar dhe 2.2 mijë të dënuar me shërbim prove.
“Ne kemi statistika se kush janë kategoritë përfituese dhe e kemi shumë të saktë. Kemi kërkuar amnisti sepse kemi 2200 persona të dënuar dhe 11 mijë të dënuar me shërbim prove. Nëse kjo merr votë në parlament, përfitojnë 700 persona të dënuar dhe 2.2 mijë të dënuar me shërbim prove. Për zbritjen me një vit të dënimit që përfitojnë gratë dhe të miturën, po ashtu përfitojnë nga 1200 në 1600 persona të dënuar. Lidhur me personat që janë në hetim apo gjykim, nëse tejkalojnë rregullin për dënime deri në 2 vite nuk do të ketë subjektivizma, për të tjerët më pas që hynë te krimet, kjo do të shikohet me shumë kujdes. Në relacionin e dorëzuar në Kuvend, kemi të gjitha mendimet e institucioneve të drejtësisë. Statistika se sa është numri i personave në hetim apo gjykim për kundërvajtje penale që përfshin amnistia është publike”, u shpreh ministri Manja.
Përfitues të amnistisë do të jenë të dënuarit që kanë marrë vendim të formës së prerë deri në 31 janar 2024 dhe që i kanë mbetur nga dënimi 4 vite për të dënuarit burra dhe 5 vite për të dënuarat gra. Mazhoranca miratoi edhe një ndryshim tjetër sa i përket përfitimit të zbritjes së dënimit, ku pjesë të saj bëri edhe personat që janë të dënuar nga Gjykata e Posaçme kundër Korrupsionit dhe Krimit të Organizuar. Kësisoj, të dënuarit e GJKKO përfitojnë 1 vit për të dënuarit burra dhe 1.5 vite për të dënuarat gra. Pavarësisht këtyre neneve të miratuara në Komision, hyrja në fuqi kërkon miratimin në seancën plenare të kësaj të enjteje ku nevojiten 84 vota dhe bojkoti i opozitës në votimin e aktit, e vështirëson arritjen e këtij numri.